مصطفى خاطر: اشتغلت نقاش مع محمد أنور وحمدي المرغني قبل التمثيل

وقال مصطفى خاطر: "انا محدش يتوقعني، صنعتي كانت نقاش، كنت صنايعي وحمدي المرغني ومحمد أنور اشتغلوا معايا، اشتغلوا معايا شغلنتين، وأنا اشتغلت كتير، اشتغلت ترزي واشتغلت حلاق وبصلح صيانة بوتاجازات وثلاجات، أجهزة منزلية، بس اللي حبتها النقاشة"، حسب تصريحاته لبودكاست "فايق ورايق" الذي يقدمه الإعلامي الرياضي إبراهيم فايق.

وأضاف مصطفى خاطر: النقاشة فيها فن ومكان بيبقى أسود مضلم وبتخرج منه، وكنا بنشتغل مع صنايعية كبار، معلمين، فكنا بنشتغل في أماكن عالية، بنعمل فلل وحاجات من دي، فكان ربنا رزقني بصنايعي كسلان، وعشان كسلان علمني، زمان كان محدش بيعلمك سر الصنعة بسهولة، وانا كنت بشتغل وانا في تانية إعدادي، ودا لما استقريت على الصنعة اللي بحبها، لأني بدأت عمل في خامسة ابتدائي.

وعن سبب عمله مبكرا، قال: "إحنا ثقافتنا في البيت كدة، لازم تتعلم صنعة، لازم يكون معاك حاجة، لو فشلت في التعليم إيه اللي يحصل؟ يكون معك حاجة تعملها وتصرف على نفسك، لازم تشتغل، ودا اللي اتعلمته، مصر احنا صنايعية أصلا دا احنا بنينا الهرم.

وأشار مصطفى خاطر: "اشتغلت مع 3 صنايعية كلهم مسجلين خطر، منهم واحد كان اسمع ابراهيم، كان بيلعب في نادي الزمالك، وحصلت له إصابة في الثانية، ملعبش وبقى يعيث في الدنيا فساد، اتعلم صنعة وبقى يشتغلها وهو راجل (ديكوريست) أد الدنيا دلوقتي، التانيين اتقلتوا وماتوا، دا اللي كمل وبقى حاجة، وعلموني، وفي 3 ثانوي بقيت أنا المقاول، واخد الشغلانة لحسابي، ويشتغل تحتي رجالة بشنبات".

واختتم مصطفى خاطر: كنت بشتغل في الجامعة عشان اجيب فلوس عشان اعمل ديكور لمسرحية، جنان رسمي، كنت صغير وبعمل فلوس حلوة، ودي اكتر من ميزة إني صغير وبريح عن أهلي وتحس بنفسك، وخدت محمد أنور وحمدي المرغني شغلانة".

يمكنك مشاركة الخبر علي صفحات التواصل